حمايا وحماتي

وصلني كلام إن حماتي جالها غيبوبة سكر ونقلوها ع المستشفى من حزنها إن سلفتي اللي هي بنت اختها سقطت

افتكرت قبل ما اسافر مع جوزي لما كنت لسه عروسة وربنا كرمني بالحمل من اول يوم وفضلت تشغلني شغل العبيد لغاية ما سقطتني وفضلت توجع في قلبي وتعايرني وتقهرني
فضلت شهرين بعدها وكرمني ربنا بحمل تاني وقولت فيه العوض

ولأن حظي زفت جوزي سافر العريش لشغله وسابني لوحدي مع أهله ويوم ما سافر اتصل جوز أخته وقال إنها ولدت فجأة ولازم حماتي تروح تقعد بيها
كانت متجوزة في محافظة تانيه

يومها وحماتي بتتكلم معاهم في التليفون حسيت حاجة بتنزل مني
دخلت جري على الحمام لقيت نزيف كتير اوي

قولتلها يا ماما انا نازل عليا نزيف وتقريبًا كده سقطت تاني

حطت أيدها على بقي وقالتلي اخرسي خالص متجيبيش السيرة دي وده مش وقته

انتي مطلوب منك تحضري حاجة بنتي اللي هاخدها معايا وتشيلي البيت الشهر اللي هغيبه ولو قولتي نزيف دي مش هروح لبنتي ووالله لو جبتي السيرة لجوزك حتى لازم اطين عيشتك

للأسف في الوقت ده كنت بخاف منها خالص وسكتت

قالتلي قومي يلا بينا وكانت مربيه فراخ لولادة بنتها ودبحTلي 20 فرخة بلدي وقالتلي يتنضفوا ويتغسلوا ويتحطوا في اكياس وتخلصي بسرعة

خلصت لقيتها بتقولي يلا تعالي نقي الكيلو السمسم والكيلو الحلبة دول وعلى الله ألاقي فيهم حصى ولا رمل

خلصتهم وطلعت لي عشرين كيلو رز وقالت يلا نقي

نقيت وخلصت وقلت هرتاح بقه قالتلي يلا عشان نخبز خبزة رقاق لبنتي اخدها معايا هناك

بدأت الحوار ده من الضهر يا بنات خلصت نص الليل وانا حنفيه مفتوحة دم

لدرجة اني في الشوية دول غيرت 8 حفاضات

خلصت ونمت وصحاتني الفجر قالت يلا انا ماشيه وعلى الله اجي ألاقي حاجة في البيت بايظة ولا ضايعه

كله كوم وحمايا كوم قال ايه ابن الكلب مبيبقاش مبسوط ولا مرتاح وحماتي بعيد عنه وبيطلع همه في اللي قدامه

الغبي صب عليا العذاب الوان

فجأة كده قرر مش هنجيب عيش من الفرن وانا هصحى كل يوم الفجر احضر رقاق أو عيش رح

ومنامش بقه ولا دقيقة غير بعد نص الليل

وطول النهار طلبات وشتيمة باللاب والأم

وانا ما بيا النزيف اللي مخلص عليا وما بيا إن البيت شغله كتيييييير خالص بهايم وطيور وخبيز كل يوم وشغل البيت وليا 3 سلايف صبيان اصغر من جوزي كانوا لسه متجوزوش وكل يوم غسيل وتحضير أكل في نص الليل ليهم ولزمايلهم ولو حمايا قفشني في نص اليوم مربعه ايدي كده ومغمضه ثواني يبهدلني ويقولي احنا مش جايبينك للنوم يا بنت الوسخة يا جعانه

كنت بموت فعلا وهما متسلطين عليا كأنهم عايزين كده

في اليوم السادس اتصلت بجوزي قولتله تعالى أشوفك قبل ما اموت

يا حبيبي ساب شغله ونزل يجري دخل لقى ابوه واقف قدام الشقة بيزعق عشان انا جوه ومش برد عليه

فتح الباب ودخل لقاني في السرير وتحتي بقعة دم كأني طير مدبوح

شالني في توكتوك وجرى بيا على دكتور قاله لازم عملية حالا وتمضي على إقرار عشان لو فتحنا ولقينا الوضع صعب هنشيل الرحم كمان وقول يارب

في عز ما هو قاعد معايا يصبرني ويقولي انا زعلان منك وازاي تفضلي ساكته على نفسك اسبوع ومتخافيش انا جنبك ومعاكي ومش عايز من الدنيا غيرك لقينا أبوه بيتصل يشتم ويسب عشان غيبنا والكلب ابن الكلب جعان وعايزني ارجع احضرله العشا

رد عليه جوزي قاله كلوا أي حاجة يا حاج عشان مراتي داخله عمليات طوارئ دلوقتي حالًا

شتم وبهدل الدنيا اكتر إن ليه معملتش أكل قبل ما امشي

ودخلت طوارئ وعملت العملية والحمد لله جت بسيطة ويدوب عملية تفريغ وعلقولي دم ولاني مكنتش جايه وعارفه اني هحتاج عملية بقى الناس اللي في المركز اللي تديني كوفيرته واللي تديني عباية واللي سالوني مع جوزي نزلوني الإسعاف اللي روحتني بيت جوزي تاني (امي وابويا ميتين)

هناك قابلني حمايا يزعق فينا إن ازاي نعمل عملية من غير ما ناخد رأيه

على بالليل كلموا حماتي قالولها لازم تنزلي عشان الزفته عملت عملية

نزلت استلمتني شتيمه وبهدله فيا وتقولي منك لله ربنا ياخدك زي ما بسببك سبت بنتي والدة وجيت

اقولها يا ماما ما هي بنتك معاها حماتها واخوات جوزها أربعة تقولي وانتي مالك وانا مالي بيكي

قومت من تاني يوم نزلت اشتغل في البيت وانا الانيميا عندي ٧ وبموت من التعب واستلموني بقه بشغل وبهدلة وعذاب اكتر من الاول عشان يعاقبوني إني نزفت لغاية ما جوزي قالهم انا هاخد مراتي معايا العريش وخدني وسبنا كل حاجة ورانا ومهمنيش إنهم خدوا كل حاجتي طظ المهم نفدت بجلدي

عمركم شوفتوا ناس مفتريه كده

ربنا شاهد على كلامي وحق الايام المفترجة دي ما كدبت ولا بالغت بالعكس أنا اختصرت

كل ما افتكر قلبي يوجعني رغم أن مر على الموضوع ده عشر سنين ورزقني ربنا فيهم باولادي التلاته بس واقفه عند الموقف ده ومش قادره أنساه ولا اسامح